Cantos Populares Sefardíes
(Agradecimientos a la Autoridad Nacional del Ladino)
LOS KANTES
POPULARES DJUDEO-ESPANYOLES
De entre los numerozos aspektos del folklor djudeo-espanyol, no ay duda ke
el de las romansas es el mas konosido i popular. A tal punto ke para munchos
esta palavra ya se izo sinonimo del kante popular sefaradi i podemos ver
anunsios i afishes sovre diskos o konsertos de “Romansas sefaradis” mientres
ke el programa inkluye jeneralmente un chiko numero solo de romansas i el
resto son kantes de otros djeneros. Es importante entonses de dar una
definision mas klara i exakta de los kantes populares djudeo-espanyoles.
LAS ROMANSAS DJUDEO-ESPANYOLAS
son kantes ke tienen sus rayizes en la romansa espanyola medievala (aun ke
ay tambien romansas ke fueron kreadas en epokas posteriores). En la mayoria
de los kavzos estos son kantes kon una forma literaria bien definida, ke
tienen por tema las aventuras ansi ke los amores, selos i enemistades de los
reyes i nobles de la Espanya medievala.
Los sefaradis ke konosian estos kantes i los avian adoptado komo parte de
sus folklor, ainda antes de la ekspulsion, kontinuaron a kantarlos despues
de 1492 tambien, konservando sus tekstos orijinales en una mizura mas grande
ke en Espanya, onde eyos tuvieron una evolusion naturala i oy tienen tekstos
bastante diferentes - en la mizura ke no fueron ulvidados.
Esto dio lugar a la impresion ke las romansas djudeo-espanyolas son una
forma fosilizada de las romansas espanyolas, transmetidas por los sefaradis
de una jenerasion a la otra, sin ningun trokamiento. Oy ya fue provado ke
esta opinion es yerrada i ke las romansas djudeo-espanyolas tambien tuvieron
una evolusion propia, aun ke munchas de eyas konservan ainda una buena parte
de los tekstos orijinales, ke permeten de identifikarlas kon algunas de las
romansas espanyolas mas konosidas. Aki damos, a titolo de ilustrasion dos de
estas romansas, tomadas de la koleksion del Proyekto Folklor
Djudeo-espanyol:
Maldicha tripa de madre
ke siete ijas pario
Sin dingun ijo varon
sin dingun ijo varon
No mos maldigash mi padre
no mos maldigash senyor
Si es por la vuestra gerra
la gerra la venso yo
LAS KANTIGAS
(o kantes lirikos, sigun son tambien yamados), son diferentes tanto en sus
forma literaria (strofika) ansi komo en sus tema: eyas ekspresan en sus
mayoria, sintimientos de amor i selo, pena i dolor etc. Este es el grupo mas
grande de los kantes djudeo-espanyoles ke son ainda kantados por los
sefaradis de muestros dias, a vezes en versiones bastante diferentes,
dependiendo del paiz onde nasieron i se engrandesieron los ke los kantan.
Aki tambien trayemos un enshemplo, del Proyekto Folklor Djudeo-espanyol:
(1) En este mundo (2) Dio de los sielos
Tuve un dezeo Patrón del mundo
Ma no lo alkansí I de la natura
De tanto azer la pasensia Azme konoser muy presto
Yo ya me kansí La mi ventura
LOS KANTES DEL SIKLO DE LA VIDA
(Nasimiento, boda i muerte) son kantes la mayoria de los kualos son kantados
en las bodas, i en una mizura mas chika son atados al nasimiento de un muevo
ijo (o mueva ija) ansi ke al dolio por la muerte de una persona kerida.
Trayemos aki enshemplos de las dos primeras de estas kategorias de kantes,
ke son los ke mas se uzan kantar ainda, en muestros dias.
O ke relumbror de novia galana
Vos m'arelumbresh la streya Diana
Veni mi novia, avlaremos
Avlaremos boda azeremos
Vos veni mi alma por la manyana
I beveresh kave kon narandjada
Veni mi novia .........
LAS KOPLAS
son en realidad el djenero mas karakteristiko de la literatura
djudeo-espanyola, kombinando la forma literaria de la kopla espanyola
medievala kon algunos de los aspektos mas karakteristikos de la kultura
sefaradi. Se trata de poemas ke tienen una struktura strofika, en la mayoria
de los kavzos tienen akrostikos, pueden ser kantados i tienen temas
variados, prinsipalmente narrativos o deskriptivos, del kampo de la
tradision djudia. La mayoria de las koplas tienen por tema la fiesta de
Purim, aun ke ay tambien koplas sovre otras fiestas djudias ansi ke sovre
temas istorikos, sosiales, morales etc. A kontinuasion trayemos 2 strofas de
una Kopla de Purim:
Empesar kero kontar
Echas del Dio Alto
De lo ke kero yo enmentar
Nada yo no falto
Kon bailes i saltos
I kon gran plazer
Saved ke Aman el mamzer
Mos kijo matarmos
I tambien atemarmos …
Correos:
eliyahubayonah@gmail.com
Copy Rights © Shalom Haverim Org - Monsey 10952, New York
Aman el Mamzer
