Bereshit / Genesis 12:1–20
פָּרָשַׁת לֶךְ־לְךָ · בְּרֵאשִׁית י״ב–י״ג
י״ב : א וַיֹּ֤אמֶר יְהֹוָה֙ אֶל־אַבְרָ֔ם לֶךְ־לְךָ֛ מֵאַרְצְךָ֥ וּמִמּֽוֹלַדְתְּךָ֖ וּמִבֵּ֣ית אָבִ֑יךָ אֶל־הָאָ֖רֶץ אֲשֶׁ֥ר אַרְאֶֽךָּ׃
י״ב : ב וְאֶֽעֶשְׂךָ֙ לְג֣וֹי גָּד֔וֹל וַאֲבָ֣רֶכְךָ֔ וַאֲגַדְּלָ֖ה שְׁמֶ֑ךָ וֶהְיֵ֖ה בְּרָכָֽה׃
י״ב : ג וַאֲבָֽרְכָה֙ מְבָ֣רְכֶ֔יךָ וּמְקַלֶּלְךָ֖ אָאֹ֑ר וְנִבְרְכ֣וּ בְךָ֔ כֹּ֖ל מִשְׁפְּחֹ֥ת הָאֲדָמָֽה׃
י״ב : ד וַיֵּ֣לֶךְ אַבְרָ֗ם כַּאֲשֶׁ֨ר דִּבֶּ֤ר אֵלָיו֙ יְהֹוָ֔ה וַיֵּ֥לֶךְ אִתּ֖וֹ ל֑וֹט וְאַבְרָ֗ם בֶּן־חָמֵ֤שׁ שָׁנִים֙ וְשִׁבְעִ֣ים שָׁנָ֔ה בְּצֵאת֖וֹ מֵחָרָֽן׃
י״ב : ה וַיִּקַּ֣ח אַבְרָם֩ אֶת־שָׂרַ֨י אִשְׁתּ֜וֹ וְאֶת־ל֣וֹט בֶּן־אָחִ֗יו וְאֶת־כׇּל־רְכוּשָׁם֙ אֲשֶׁ֣ר רָכָ֔שׁוּ וְאֶת־הַנֶּ֖פֶשׁ אֲשֶׁר־עָשׂ֣וּ בְחָרָ֑ן וַיֵּצְא֗וּ לָלֶ֙כֶת֙ אַ֣רְצָה כְּנַ֔עַן וַיָּבֹ֖אוּ אַ֥רְצָה כְּנָֽעַן׃
י״ב : ו וַיַּעֲבֹ֤ר אַבְרָם֙ בָּאָ֔רֶץ עַ֚ד מְק֣וֹם שְׁכֶ֔ם עַ֖ד אֵל֣וֹן מוֹרֶ֑ה וְהַֽכְּנַעֲנִ֖י אָ֥ז בָּאָֽרֶץ׃
י״ב : ז וַיֵּרָ֤א יְהֹוָה֙ אֶל־אַבְרָ֔ם וַיֹּ֕אמֶר לְזַ֨רְעֲךָ֔ אֶתֵּ֖ן אֶת־הָאָ֣רֶץ הַזֹּ֑את וַיִּ֤בֶן שָׁם֙ מִזְבֵּ֔חַ לַיהֹוָ֖ה הַנִּרְאֶ֥ה אֵלָֽיו׃
י״ב : ח וַיַּעְתֵּ֨ק מִשָּׁ֜ם הָהָ֗רָה מִקֶּ֛דֶם לְבֵֽית־אֵ֖ל וַיֵּ֣ט אׇהֳלֹ֑ה בֵּֽית־אֵ֤ל מִיָּם֙ וְהָעַ֣י מִקֶּ֔דֶם וַיִּֽבֶן־שָׁ֤ם מִזְבֵּ֙חַ֙ לַֽיהֹוָ֔ה וַיִּקְרָ֖א בְּשֵׁ֥ם יְהֹוָֽה׃
י״ב : ט וַיִּסַּ֣ע אַבְרָ֔ם הָל֥וֹךְ וְנָס֖וֹעַ הַנֶּֽגְבָּה׃
י״ב : י וַיְהִ֥י רָעָ֖ב בָּאָ֑רֶץ וַיֵּ֨רֶד אַבְרָ֤ם מִצְרַ֙יְמָה֙ לָג֣וּר שָׁ֔ם כִּֽי־כָבֵ֥ד הָרָעָ֖ב בָּאָֽרֶץ׃
י״ב : יא-כ (וַיְהִ֕י כַּאֲשֶׁ֥ר הִקְרִ֖יב לָב֣וֹא מִצְרָ֑יְמָה...) וַיְצַ֥ו עָלָ֛יו פַּרְעֹ֖ה אֲנָשִׁ֑ים וַֽיְשַׁלְּח֥וּ אֹת֛וֹ וְאֶת־אִשְׁתּ֖וֹ וְאֶת־כׇּל־אֲשֶׁר־לֽוֹ׃
י״ג : א וַיַּ֩עַל֩ אַבְרָ֨ם מִמִּצְרַ֜יִם ה֠וּא וְאִשְׁתּ֧וֹ וְכׇל־אֲשֶׁר־ל֛וֹ וְל֥וֹט עִמּ֖וֹ הַנֶּֽגְבָּה׃
י״ג : ב וְאַבְרָ֖ם כָּבֵ֣ד מְאֹ֑ד בַּמִּקְנֶ֕ה בַּכֶּ֖סֶף וּבַזָּהָֽב׃
י״ג : ג-ד וַיֵּ֙לֶךְ֙ לְמַסָּעָ֔יו מִנֶּ֖גֶב וְעַד־בֵּֽית־אֵ֑ל... וַיִּקְרָ֥א שָׁ֛ם אַבְרָ֖ם בְּשֵׁ֥ם יְהֹוָֽה׃
י״ג : ה-יח (וְגַם־לְל֔וֹט... וַיִּבֶן־שָׁ֥ם מִזְבֵּ֖חַ לַֽיהֹוָֽה׃)
לֶךְ־לְךָ — עֲלִיָּה שני
פָּרָשַׁת לֶךְ־לְךָ · עֲלִיָּה שְׁלִישִׁית · בְּרֵאשִׁית י״ד : א–כ״ד
י״ד : א וַיְהִ֗י בִּימֵי֙ אַמְרָפֶ֣ל מֶֽלֶךְ־שִׁנְעָ֔ר אַרְיוֹךְ֙ מֶ֣לֶךְ אֶלָּסָ֔ר כְּדָרְלָעֹ֙מֶר֙ מֶ֣לֶךְ עֵילָ֔ם וְתִדְעָ֖ל מֶ֥לֶךְ גּוֹיִֽם׃
י״ד : ב עָשׂ֣וּ מִלְחָמָ֗ה אֶת־בֶּ֙רַע֙ מֶ֣לֶךְ סְדֹ֔ם וְאֶת־בִּרְשַׁ֖ע מֶ֣לֶךְ עֲמֹרָ֑ה שִׁנְאָ֣ב מֶ֣לֶךְ אַדְמָ֗ה וְשֶׁמְאֵ֙בֶר֙ מֶ֣לֶךְ צְבוֹיִ֔ם וּמֶ֥לֶךְ בֶּ֖לַע הִ֥יא צֹֽעַר׃
י״ד : ג כָּל־אֵ֙לֶּה֙ חָֽבְר֔וּ אֶל־עֵ֖מֶק הַשִּׂדִּ֑ים ה֖וּא יָ֥ם הַמֶּֽלַח׃
י״ד : ד שְׁתֵּ֤ים עֶשְׂרֵה֙ שָׁנָ֔ה עָבְד֖וּ אֶת־כְּדָרְלָעֹ֑מֶר וּבַשְּׁלֹשׁ־עֶשְׂרֵ֖ה שָׁנָ֥ה מָרָֽדוּ׃
י״ד : ה וּבְאַרְבַּ֣ע עֶשְׂרֵ֗ה שָׁנָה֙ בָּ֣א כְּדָרְלָעֹ֔מֶר וְהַמְּלָכִ֖ים אֲשֶׁ֣ר אִתּ֑וֹ וַיַּכּוּ֙ אֶת־הָרְפָאִ֔ים בְּעַשְׁתְּרֹ֖ת קַרְנַ֑יִם וְאֶת־הַזּוּזִ֥ים בְּהָ֖ם וְאֶת־הָאֵמִ֥ים בְּשָׁוֵֽה קִרְיָתָֽיִם׃
י״ד : ו וְאֶת־הַחֹרִי֙ בְּהַרְרָ֣ם שֵׂעִ֔יר עַד־אֵ֖יל פָּארָ֑ן אֲשֶׁ֥ר עַל־הַמִּדְבָּֽר׃
י״ד : ז וַיָּשֻׁ֜בוּ וַיָּבֹ֣אוּ אֶל־עֵֽין־מִשְׁפָּ֗ט הִ֣וא קָדֵ֔שׁ וַיַּכּ֕וּ אֶת־כׇּל־שְׂדֵ֖ה הָעֲמָלֵקִ֑י וְגַ֛ם אֶת־הָאֱמֹרִ֥י הַיֹּשֵׁ֖ב בְּחַצְצֹ֥ן תָּמָֽר׃
י״ד : ח וַיֵּצֵ֞א מֶ֣לֶךְ סְדֹ֗ם וּמֶ֙לֶךְ֙ עֲמֹרָ֔ה וּמֶ֥לֶךְ אַדְמָ֖ה וּמֶ֣לֶךְ צְבוֹיִ֑ם וּמֶ֥לֶךְ בֶּ֖לַע הִ֣יא צֹ֔עַר וַיַּעַרְכ֥וּ אִתָּ֖ם מִלְחָמָֽה׃
י״ד : ט אֵ֣ת כְּדָרְלָעֹ֗מֶר מֶ֚לֶךְ עֵילָ֔ם וְתִדְעָ֖ל מֶ֣לֶךְ גּוֹיִ֑ם וְאַמְרָפֶ֣ל מֶֽלֶךְ־שִׁנְעָ֗ר וְאַרְיוֹךְ֙ מֶ֣לֶךְ אֶלָּסָ֔ר אַרְבָּעָ֥ה מְלָכִ֖ים אֶת־הַחֲמִשָּֽׁה׃
י״ד : י וְעֵ֣מֶק הַשִּׂדִּ֗ים בְּאֵרֹ֛ת בְּאֵרֹ֥ת חֵמָ֖ר וַיָּנֻ֣סוּ מֶֽלֶךְ־סְדֹ֣ם וַעֲמֹרָ֑ה וַיִּפְּל֣וּ שָׁ֔מָּה וְהַנִּשְׁאָרִ֖ים הֶהָ֥רָה נָֽסוּ׃
י״ד : יא וַיִּקְח֗וּ אֶת־כׇּל־רְכוּשׁ֙ סְדֹ֣ם וַעֲמֹרָ֔ה וְאֶת־כׇּל־אָכְלָ֖ם וַיֵּלֵֽכוּ׃
י״ד : יב וַיִּקְח֞וּ אֶת־לוֹט֙ וְאֶת־רְכוּשׁ֔וֹ בֶּן־אֲחִ֖י אַבְרָ֑ם וַיֵּלֵ֕כוּ וְה֖וּא יֹשֵׁ֥ב בִּסְדֹֽם׃
י״ד : יג וַיָּבֹא֙ הַפָּלִ֔יט וַיַּגֵּ֖ד לְאַבְרָ֣ם הָעִבְרִ֑י וְהוּא֙ שֹׁכֵ֣ן בְּאֵלֹנֵ֣י מַמְרֵ֣א הָאֱמֹרִ֗י אֲחִ֤י אֶשְׁכֹּל֙ וַאֲחִ֣י עָנֵ֔ר וְהֵ֖ם בַּעֲלֵ֥י בְרִֽית־אַבְרָֽם׃
י״ד : יד וַיִּשְׁמַ֣ע אַבְרָ֔ם כִּ֥י נִשְׁבָּ֖ה אָחִ֑יו וַיָּ֣רֶק אֶת־חֲנִיכָ֗יו יְלִידֵ֙י בֵית֔וֹ שְׁמֹנָ֥ה עָשָׂ֖ר וּשְׁלֹ֣שׁ מֵא֑וֹת וַיִּרְדֹּ֖ף עַד־דָּֽן׃
י״ד : טו וַיֵּחָלֵ֣ק עֲלֵיהֶ֗ם לַיְלָה֙ ה֣וּא וַעֲבָדָ֔יו וַיַּכֵּ֕ם וַיִּרְדְּפֵ֖ם עַד־חוֹבָ֑ה אֲשֶׁ֖ר מִשְּׂמֹ֥אל לְדַמָּֽשֶׂק׃
י״ד : טז וַיָּ֕שֶׁב אֵ֖ת כׇּל־הָרְכֻ֑שׁ וְגַם־אֶת־לוֹט֙ אָחִ֣יו וּרְכֻשׁ֔וֹ הֵשִׁ֖יב וְגַם־הַנָּשִׁ֥ים וְהָעָֽם׃
י״ד : יז וַיֵּצֵ֞א מֶ֣לֶךְ סְדֹ֗ם לִקְרָאת֙וֹ אַחֲרֵ֣י שׁוּבוֹ֮ מֵהַכּוֹת֒ אֶת־כְּדָרְלָעֹ֙מֶר֙ וְאֶת־הַמְּלָכִ֣ים אֲשֶׁ֣ר אִתּ֔וֹ אֶל־עֵ֖מֶק שָׁוֵ֑ה ה֖וּא עֵ֥מֶק הַמֶּֽלֶךְ׃
י״ד : יח וּמַלְכִּי־צֶ֙דֶק֙ מֶ֣לֶךְ שָׁלֵ֔ם הוֹצִ֖יא לֶ֣חֶם וָיָ֑יִן וְה֥וּא כֹהֵ֖ן לְאֵ֥ל עֶלְיוֹֽן׃
י״ד : יט וַיְבָ֣רְכֵ֔הוּ וַיֹּאמַ֕ר בָּר֖וּךְ אַבְרָ֑ם לְאֵ֥ל עֶלְי֖וֹן קֹנֵ֥ה שָׁמַֽיִם וָאָֽרֶץ׃
י״ד : כ וּבָר֣וּךְ אֵ֔ל עֶלְי֖וֹן אֲשֶׁר־מִגֵּ֣ן צָרֶ֑יךָ בְּיָדֶ֔ךָ וַיִּתֶּן־ל֖וֹ מַעֲשֵׂ֥ר מִכֹּֽל׃
י״ד : כא וַיֹּ֥אמֶר מֶֽלֶךְ־סְדֹ֖ם אֶל־אַבְרָ֑ם תֶּן־לִ֣י הַנֶּ֔פֶשׁ וְהָרְכֻ֖שׁ קַ֥ח־לָֽךְ׃
י״ד : כב וַיֹּ֣אמֶר אַבְרָ֔ם אֶל־מֶ֥לֶךְ סְדֹ֖ם הֲרִימֹ֣תִי יָדִ֑י אֶל־יְהֹוָ֗ה אֵ֚ל עֶלְי֔וֹן קֹנֵ֖ה שָׁמַ֥יִם וָאָֽרֶץ׃
י״ד : כג אִם־מִחוּט֙ וְעַד־שְׂר֣וֹךְ נַ֔עַל וְאִם־אֶקַּ֥ח מִכׇּל־אֲשֶׁר־לְךָ֖ וְלֹ֣א תֹאמַ֑ר אֲנִ֥י הֶעֱשַׁ֖רְתִּי אֶת־אַבְרָֽם׃
י״ד : כד בִּלְעָדַ֗י רַ֚ק אֲשֶׁ֣ר אָכְל֣וּ הַנְּעָרִ֔ים וְחֵ֥לֶק הָאֲנָשִׁ֖ים אֲשֶׁ֣ר הָלְכ֣וּ אִתִּ֑י עָנֵ֥ר אֶשְׁכֹּ֖ל וּמַמְרֵ֑א הֵ֖ם יִקְח֥וּ חֶלְקָֽם׃
לֶךְ־לְךָ — עֲלִיָּה שְׁלִישִׁית
פָּרָשַׁת לֶךְ־לְךָ · עֲלִיָּה רְבִיעִית · בְּרֵאשִׁית ט״ו : א–כ״א
ט״ו : א אַחַ֣ר הַדְּבָרִ֣ים הָאֵ֗לֶּה הָיָ֤ה דְבַר־יְהֹוָה֙ אֶל־אַבְרָ֔ם בַּמַּחֲזֶ֖ה לֵאמֹ֑ר אַל־תִּירָ֣א אַבְרָ֔ם אָנֹכִ֖י מָגֵ֣ן לָ֑ךְ שְׂכָרְךָ֖ הַרְבֵּ֥ה מְאֹֽד׃
ט״ו : ב וַיֹּאמֶר֩ אַבְרָ֨ם אֲדֹנָ֧י יֱהֹוִ֛ה מַה־תִּתֶּן־לִ֖י וְאָנֹכִ֣י הוֹלֵ֑ךְ עֲרִירִ֔י וּבֶן־מֶ֣שֶׁק בֵּיתִ֔י ה֖וּא דַּמֶּ֥שֶׂק אֱלִיעֶֽזֶר׃
ט״ו : ג וַיֹּ֣אמֶר אַבְרָ֔ם הֵ֣ן לִ֔י לֹ֥א נָתַ֖תָּ זָ֑רַע וְהִנֵּ֥ה בֶן־בֵּיתִ֖י יוֹרֵ֥שׁ אֹתִֽי׃
ט״ו : ד וְהִנֵּ֣ה דְבַר־יְהֹוָ֣ה אֵלָ֗יו לֵאמֹ֔ר לֹא־יִירָ֥שְׁךָ֖ זֶ֑ה כִּ֣י אִם־אֲשֶׁ֣ר יֵצֵ֤א מִמֵּעֶ֙יךָ֙ ה֔וּא יִירָ֥שֶׁךָֽ׃
ט״ו : ה וַיּוֹצֵ֨א אֹת֜וֹ הַח֗וּצָה וַיֹּ֙אמֶר֙ הַבֶּט־נָ֣א הַשָּׁמַ֔יְמָה וּסְפֹ֥ר הַכּוֹכָבִ֖ים אִם־תּוּכַ֣ל לִסְפֹּ֑ר אֹתָ֗ם וַיֹּ֤אמֶר לוֹ֙ כֹּ֥ה יִהְיֶ֖ה זַרְעֶֽךָ׃
ט״ו : ו וְהֶאֱמִ֖ן בַּיהֹוָ֑ה וַיַּחְשְׁבֶ֥הָ לּ֖וֹ צְדָקָֽה׃
ט״ו : ז וַיֹּ֣אמֶר אֵלָ֗יו אֲנִ֣י יְהֹוָ֔ה אֲשֶׁר־הוֹצֵאתִ֥יךָ מֵאוּר־כַּשְׂדִּ֖ים לָתֵ֥ת לְךָ֖ אֶת־הָאָ֣רֶץ הַזֹּ֑את לְרִשְׁתָּֽהּ׃
ט״ו : ח וַיֹּאמַ֑ר אֲדֹנָ֣י יֱהֹוִ֔ה בַּמָּ֥ה אֵדַ֖ע כִּ֥י אִירָשֶֽׁנָּה׃
ט״ו : ט וַיֹּ֣אמֶר אֵלָ֗יו קְחָ֤ה לִי֙ עֶגְלָ֣ה מְשֻׁלֶּ֔שֶׁת וְעֵז־מְשֻׁלֶּ֖שֶׁת וְאַ֣יִל מְשֻׁלָּ֑שׁ וְתֹ֖ר וְגוֹזָֽל׃
ט״ו : י וַיִּקַּ֣ח לוֹ֮ אֶת־כׇּל־אֵ֒לֶּה֒ וַיְבַתֵּ֣ר אֹתָ֗ם בַּתָּ֛וֶךְ וַיִּתֵּ֥ן אִישׁ־בִּתְרוֹ֖ לִקְרַ֣את רֵעֵ֑הוּ וְאֶת־הַצִּפֹּ֖ר לֹ֥א בָתָֽר׃
ט״ו : יא וַיֵּ֥רֶד הָעַ֖יִט עַל־הַפְּגָרִ֑ים וַיַּשֵּׁ֥ב אֹתָ֖ם אַבְרָֽם׃
ט״ו : יב וַיְהִ֗י הַשֶּׁ֛מֶשׁ לָב֥וֹא וְתַרְדֵּמָ֖ה נָפְלָ֣ה עַל־אַבְרָ֑ם וְהִנֵּ֤ה אֵימָה֙ חֲשֵׁכָ֣ה גְדֹלָ֔ה נֹפֶ֖לֶת עָלָֽיו׃
ט״ו : יג וַיֹּ֣אמֶר לְאַבְרָ֔ם יָדֹ֣עַ תֵּדַ֔ע כִּֽי־גֵ֛ר יִהְיֶ֥ה זַרְעֲךָ֖ בְּאֶ֣רֶץ לֹא־לָהֶ֑ם וַעֲבָד֣וּם וְעִנּ֣וּ אֹתָ֔ם אַרְבַּ֥ע מֵא֖וֹת שָׁנָֽה׃
ט״ו : יד וְגַ֣ם אֶת־הַגּ֔וֹי אֲשֶׁ֥ר יַעֲבֹ֖דוּ דָּ֣ן אָנֹכִ֑י וְאַחֲרֵי־כֵ֥ן יֵצְא֖וּ בִּרְכֻ֥שׁ גָּדֽוֹל׃
ט״ו : טו וְאַתָּ֛ה תָּב֥וֹא אֶל־אֲבֹתֶ֖יךָ בְּשָׁל֑וֹם תִּקָּבֵ֖ר בְּשֵׂיבָ֥ה טוֹבָֽה׃
ט״ו : טז וְדוֹר֙ רְבִיעִ֔י יָשׁוּבוּ֙ הֵ֔נָּה כִּ֣י לֹא־שָׁלֵ֔ם עֲוֺ֖ן הָאֱמֹרִ֑י עַ֖ד הֵֽנָּה׃
ט״ו : יז וַיְהִ֣י הַשֶּׁ֗מֶשׁ בָּ֚אָה וַעֲלָטָ֣ה הָיָ֔ה וְהִנֵּ֛ה תַּנּ֥וּר עָשָׁ֖ן וְלַפִּ֣יד אֵ֑שׁ אֲשֶׁ֣ר עָבַ֔ר בֵּ֖ין הַגְּזָרִֽים הָאֵֽלֶּה׃
ט״ו : יח בַּיּוֹם֙ הַה֣וּא כָּרַ֣ת יְהֹוָ֔ה אֶת־אַבְרָ֖ם בְּרִ֣ית לֵאמֹ֑ר לְזַרְעֲךָ֣ נָתַ֔תִּי אֶת־הָאָ֖רֶץ הַזֹּ֑את מִנְּהַר־מִצְרַ֖יִם עַד־הַנָּהָ֥ר הַגָּדֹ֖ל נְהַר־פְּרָֽת׃
ט״ו : יט אֶת־הַקֵּינִי֙ וְאֶת־הַקְּנִזִּ֔י וְאֵ֖ת הַקַּדְמֹנִֽי׃
ט״ו : כ וְאֶת־הַחִתִּ֥י וְאֶת־הַפְּרִזִּ֖י וְאֶת־הָרְפָאִֽים׃
ט״ו : כא וְאֶת־הָאֱמֹרִ֥י וְאֶת־הַכְּנַעֲנִ֖י וְאֶת־הַגִּרְגָּשִׁ֑י וְאֶת־הַיְבוּסִֽי׃
לֶךְ־לְךָ — עֲלִיָּה רְבִיעִית
פָּרָשַׁת לֶךְ־לְךָ · עֲלִיָּה חֲמִישִׁית · בְּרֵאשִׁית ט״ז : א–ט״ז
ט״ז : א וְשָׂרַ֣י אֵ֣שֶׁת אַבְרָ֗ם לֹ֣א יָלְדָ֤ה לוֹ֙ וְלָ֣הּ שִׁפְחָ֔ה מִצְרִ֖ית וּשְׁמָ֥הּ הָגָֽר׃
ט״ז : ב וַתֹּ֨אמֶר שָׂרַ֤י אֶל־אַבְרָם֙ הִנֵּה־נָ֣א עֲצָרַ֔נִי יְהֹוָ֖ה מִלֶּ֣דֶת בֹּ֣א נָ֗א אֶל־שִׁפְחָתִ֛י אוּלַ֥י אִבָּנֶ֖ה מִמֶּ֑נָּה וַיִּשְׁמַ֥ע אַבְרָ֖ם לְקוֹל שָׂרָֽי׃
ט״ז : ג וַתִּקַּ֣ח שָׂרַ֣י אֵֽשֶׁת־אַבְרָ֡ם אֶת־הָגָר֩ הַמִּצְרִ֨ית שִׁפְחָתָ֜הּ מִקֵּץ֩ עֶ֨שֶׂר שָׁנִ֜ים לְשֶׁ֣בֶת אַבְרָ֗ם בְּאֶ֙רֶץ֙ כְּנָ֔עַן וַתִּתֵּ֥ן אֹתָ֛הּ לְאַבְרָ֥ם אִישָׁ֖הּ לּוֹ לְאִשָּֽׁה׃
ט״ז : ד וַיָּבֹ֥א אֶל־הָגָ֖ר וַתַּ֣הַר וַתֵּ֤רֶא כִּֽי־הָרָ֙תָה֙ וַתֵּקַ֣ל גְּבִרְתָּ֔הּ בְּעֵינֶֽיהָ׃
ט״ז : ה וַתֹּ֨אמֶר שָׂרַ֜י אֶל־אַבְרָ֗ם חֲמָסִ֙י עָלֶ֜יךָ אָֽנֹכִי־נָתַ֤תִּי שִׁפְחָתִי֙ בְּחֵיקֶ֔ךָ וַתֵּ֧רֶא כִּֽי־הָרָ֛תָה וָאֵקַ֥ל בְּעֵינֶ֖יהָ יִשְׁפֹּ֥ט יְהֹוָ֖ה בֵּינִ֥י וּבֵינֶֽיךָ׃
ט״ז : ו וַיֹּ֤אמֶר אַבְרָם֙ אֶל־שָׂרַ֔י הִנֵּ֥ה שִׁפְחָתֵ֖ךְ בְּיָדֵ֑ךְ עֲשִׂי־לָ֣הּ הַטּ֔וֹב בְּעֵינָ֖יִךְ וַתְּעַנֶּ֣הָ שָׂרַ֑י וַתִּבְרַ֖ח מִפָּנֶֽיהָ׃
ט״ז : ז וַיִּמְצָאָ֞הּ מַלְאַ֧ךְ יְהֹוָ֛ה עַל־עֵ֥ין הַמַּ֖יִם בַּמִּדְבָּ֑ר עַל־הָעַ֖יִן בְּדֶ֥רֶךְ שֽׁוּר׃
ט״ז : ח וַיֹּ֣אמֶר הָגָ֔ר שִׁפְחַ֖ת שָׂרַ֣י אֵ֑י מִזֶּ֣ה בָ֔את וְאָנָ֖ה תֵלֵ֑כִי וַתֹּ֕אמֶר מִפְּנֵ֥י שָׂרַ֖י גְּבִרְתִּ֥י אָנֹכִֽי בֹרַֽחַת׃
ט״ז : ט וַיֹּ֨אמֶר לָ֤הּ מַלְאַֽךְ־יְהֹוָה֙ שׁ֣וּבִי אֶל־גְּבִרְתֵּ֔ךְ וְהִתְעַנִּ֖י תַּ֥חַת יָדֶֽיהָ׃
ט״ז : י וַיֹּ֨אמֶר לָ֤הּ מַלְאַֽךְ־יְהֹוָה֙ הַרְבָּ֣ה אַרְבֶּ֔ה אֶת־זַרְעֵ֖ךְ וְלֹ֣א יִסָּפֵ֑ר מֵרֹֽב׃
ט״ז : יא וַיֹּ֣אמֶר לָ֗הּ מַלְאַ֧ךְ יְהֹוָ֛ה הִנָּ֥ךְ הָרָ֖ה וְיֹלַ֣דְתְּ בֵּ֑ן וְקָרָ֤את שְׁמוֹ֙ יִשְׁמָעֵ֔אל כִּ֥י שָׁמַ֖ע יְהֹוָ֥ה אֶל־עָנְיֵֽךְ׃
ט״ז : יב וְה֤וּא יִהְיֶה֙ פֶּ֣רֶא אָדָ֔ם יָד֣וֹ בַכֹּ֔ל וְיַד־כֹּ֖ל בּ֑וֹ וְעַל־פְּנֵ֥י כׇל־אֶחָ֖יו יִשְׁכֹּֽן׃
ט״ז : יג וַתִּקְרָ֤א שֵׁם־יְהֹוָה֙ הַדֹּבֵ֣ר אֵלֶ֔יהָ אַתָּ֖ה אֵ֣ל רֳאִ֑י כִּ֣י אָֽמְרָ֔ה הֲגַ֥ם הֲלֹ֛ם רָאִ֖יתִי אַחֲרֵ֥י רֹאִֽי׃
ט״ז : יד עַל־כֵּ֗ן קָרָ֛א לַבְּאֵ֥ר בְּאֵֽר־לַחַ֥י רֹאִ֖י הִ֑נֵּה בֵּ֥ין קָדֵ֖שׁ וּבֵ֥ין בָּֽרֶד׃
ט״ז : טו וַתֵּ֣לֶד הָגָ֗ר לְאַבְרָ֙ם֙ בֵּ֔ן וַיִּקְרָ֧א אַבְרָ֛ם שֶׁ֥ם בְּנ֖וֹ אֲשֶׁ֣ר יָלְדָה־הָגָ֑ר יִשְׁמָעֵֽאל׃
ט״ז : טז וְאַבְרָ֕ם בֶּן־שְׁמֹנִ֥ים שָׁנָ֖ה וְשֵׁ֣שׁ שָׁנִ֑ים בְּלֶ֣דֶת הָגָ֔ר אֶת־יִשְׁמָעֵ֖אל לְאַבְרָֽם׃
לֶךְ־לְךָ — עֲלִיָּה חֲמִישִׁית
פָּרָשַׁת לֶךְ־לְךָ · עֲלִיָּה שִׁשִּׁית · בְּרֵאשִׁית י״ז : א–כ״ז
י״ז : א וַיְהִ֣י אַבְרָ֗ם בֶּן־תִּשְׁעִ֥ים שָׁנָ֛ה וְתֵ֥שַׁע שָׁנִ֖ים וַיֵּרָ֣א יְהֹוָ֣ה אֶל־אַבְרָ֑ם וַיֹּ֣אמֶר אֵלָ֗יו אֲנִ֛י־אֵ֥ל שַׁדַּ֖י הִתְהַלֵּ֥ךְ לְפָנַ֖י וֶהְיֵ֥ה תָמִֽים׃
י״ז : ב וְאֶתְּנָ֥ה בְרִיתִ֖י בֵּינִ֣י וּבֵינֶ֑ךָ וְאַרְבֶּ֥ה אוֹתְךָ֖ בִּמְאֹ֥ד מְאֹֽד׃
י״ז : ג וַיִּפֹּ֥ל אַבְרָ֖ם עַל־פָּנָ֑יו וַיְדַבֵּ֥ר אִתּ֛וֹ אֱלֹהִ֖ים לֵאמֹֽר׃
י״ז : ד אֲנִ֕י הִנֵּ֥ה בְרִיתִ֖י אִתָּ֑ךְ וְהָיִ֕יתָ לְאַב־הֲמ֥וֹן גּוֹיִֽם׃
י״ז : ה וְלֹא־יִקָּרֵ֥א עוֹד֙ אֶת־שִׁמְךָ֣ אַבְרָ֔ם וְהָיָ֥ה שִׁמְךָ֖ אַבְרָהָ֑ם כִּ֣י אַב־הֲמ֥וֹן גּוֹיִ֖ם נְתַתִּֽיךָ׃
י״ז : ו וְהִפְרֵתִ֣י אוֹתְךָ֔ בִּמְאֹ֖ד מְאֹ֑ד וּנְתַתִּ֤יךָ֙ לְגוֹיִ֔ם וּמְלָכִ֖ים מִמְּךָ֥ יֵצֵֽאוּ׃
י״ז : ז וַהֲקִמֹתִ֨י אֶת־בְּרִיתִ֜י בֵּינִ֣י וּבֵינְךָ֗ וּבֵ֚ין זַרְעֲךָ֙ אַחֲרֶ֔יךָ לְדֹרֹתָ֖ם לִבְרִ֣ית עוֹלָ֑ם לִהְי֤וֹת לְךָ֙ לֵֽאלֹהִ֔ים וּלְזַרְעֲךָ֖ אַחֲרֶֽיךָ׃
י״ז : ח וְנָתַתִּ֣י לְךָ֗ וּלְזַרְעֲךָ֙ אַחֲרֶ֔יךָ אֵ֚ת אֶ֣רֶץ מְגוּרֶ֔יךָ אֵ֖ת כׇּל־אֶ֣רֶץ כְּנָ֑עַן לַאֲחֻזַּ֖ת עוֹלָֽם וְהָיִ֥יתִי לָהֶ֖ם לֵאלֹהִֽים׃
י״ז : ט וַיֹּ֣אמֶר אֱלֹהִ֔ים אֶל־אַבְרָהָ֖ם וְאַתָּ֣ה אֶת־בְּרִיתִ֑י תִּשְׁמֹ֔ר אַתָּ֕ה וְזַרְעֲךָ֖ אַחֲרֶֽיךָ לְדֹרֹתָֽם׃
י״ז : י זֹ֣את בְּרִיתִ֗י אֲשֶׁ֤ר תִּשְׁמְרוּ֙ בֵּינִ֣י וּבֵינֵיכֶ֔ם וּבֵ֖ין זַרְעֲךָ֣ אַחֲרֶ֑יךָ הִמּ֥וֹל לָכֶ֖ם כׇּל־זָכָֽר׃
י״ז : יא וּנְמַלְתֶּ֕ם אֵ֖ת בְּשַׂ֣ר עׇרְלַתְכֶ֑ם וְהָיָ֥ה לְא֖וֹת בְּרִ֥ית בֵּינִֽי וּבֵינֵיכֶֽם׃
י״ז : יב וּבֶן־שְׁמֹנַ֣ת יָמִ֗ים יִמּוֹל֙ לָכֶ֔ם כׇּל־זָכָ֖ר לְדֹרֹתֵיכֶ֑ם יְלִ֣יד בָּ֔יִת וּמִקְנַ֥ת־כֶּ֖סֶף מִכׇּל־בֶּן־נֵכָ֥ר אֲשֶׁ֖ר לֹא־מִזַּרְעֲךָֽ הוּא׃
י״ז : יג הִמּ֥וֹל יִמּוֹל֙ יְלִ֣יד בֵּ֔יתְךָ וּמִקְנַ֥ת כַּסְפֶּ֖ךָ וְהָיְתָ֣ה בְרִיתִ֔י בִּבְשַׂרְכֶ֖ם לִבְרִ֥ית עוֹלָֽם׃
י״ז : יד וְעָרֵ֣ל זָכָ֗ר אֲשֶׁ֤ר לֹֽא־יִמּוֹל֙ אֶת־בְּשַׂ֣ר עׇרְלָת֔וֹ וְנִכְרְתָ֛ה הַנֶּ֥פֶשׁ הַהִ֖וא מֵעַמֶּ֑יהָ אֶת־בְּרִיתִ֖י הֵפַֽר׃
י״ז : טו וַיֹּ֤אמֶר אֱלֹהִים֙ אֶל־אַבְרָהָ֔ם שָׂרַ֣י אִשְׁתְּךָ֔ לֹ֥א תִקְרָ֥א אֶת־שְׁמָ֖הּ שָׂרָ֑י כִּ֥י שָׂרָ֖ה שְׁמָֽהּ׃
י״ז : טז וּבֵרַכְתִּ֣י אֹתָ֔הּ וְגַ֨ם נָתַ֥תִּי מִמֶּ֛נָּה לְךָ֖ בֵּ֑ן וּבֵרַכְתִּ֣יהָ וְהָיְתָ֗ה לְגוֹיִם֙ מַלְכֵ֣י עַמִּ֔ים מִמֶּ֖נָּה יִהְיֽוּ׃
י״ז : יז וַיִּפֹּ֨ל אַבְרָהָ֤ם עַל־פָּנָיו֙ וַיִּצְחָ֔ק וַיֹּ֣אמֶר בְּלִבּ֔וֹ הַלְבֶן־מֵאָ֣ה שָׁנָ֔ה יִוָּלֵ֖ד וְאִ֣ם שָׂרָ֔ה הֲבַת־תִּשְׁעִ֥ים שָׁנָ֖ה תֵּלֵֽד׃
י״ז : יח וַיֹּ֥אמֶר אַבְרָהָ֖ם אֶל־הָאֱלֹהִ֑ים ל֥וּ יִשְׁמָעֵ֖אל יִחְיֶ֥ה לְפָנֶֽיךָ׃
י״ז : יט וַיֹּ֣אמֶר אֱלֹהִ֗ים אֲבָל֙ שָׂרָ֣ה אִשְׁתְּךָ֗ יֹלֶ֤דֶת לְךָ֙ בֵּ֔ן וְקָרָ֥אתָ אֶת־שְׁמ֖וֹ יִצְחָ֑ק וַהֲקִמֹתִ֨י אֶת־בְּרִיתִ֜י אִתּ֗וֹ לִבְרִ֥ית עוֹלָ֛ם לְזַרְע֖וֹ אַחֲרָֽיו׃
י״ז : כ וּלְיִשְׁמָעֵ֣אל שְׁמַעְתִּ֗יךָ הִנֵּ֤ה בֵרַ֙כְתִּי֙ אֹת֔וֹ וְהִפְרֵיתִ֥י אֹת֖וֹ וְהִרְבֵּיתִ֣י אֹת֑וֹ בִּמְאֹ֣ד מְאֹ֗ד שְׁנֵים־עָשָׂ֥ר נְשִׂיאִ֖ם יוֹלִ֑יד וּנְתַתִּ֥יו לְגוֹי־גָּדֽוֹל׃
י״ז : כא וְאֶת־בְּרִיתִ֗י אָקִ֛ים אֶת־יִצְחָ֥ק אֲשֶׁר֩ תֵּלֵ֨ד לְךָ֧ שָׂרָ֛ה לַמּוֹעֵ֖ד הַזֶּ֑ה בַּשָּׁנָ֖ה הָאַחֶֽרֶת׃
י״ז : כב וַיְכַ֥ל לְדַבֵּ֖ר אִתּ֑וֹ וַיַּ֣עַל אֱלֹהִ֔ים מֵעַ֖ל אַבְרָהָֽם׃
י״ז : כג וַיִּקַּ֨ח אַבְרָהָ֜ם אֶת־יִשְׁמָעֵ֣אל בְּנ֗וֹ וְאֵ֣ת כׇּל־יִלִידֵ֤י בֵיתוֹ֙ וְאֵ֣ת כׇּל־מִקְנַ֣ת כַּסְפּ֔וֹ כׇּל־זָכָ֖ר בְּאַנְשֵׁ֣י בֵית אַבְרָהָ֑ם וַיָּ֕מָל אֶת־בְּשַׂ֖ר עׇרְלָתָֽם בְּעֶ֥צֶם הַיּֽוֹם־הַזֶּֽה׃
י״ז : כד וְאַבְרָהָ֖ם בֶּן־תִּשְׁעִ֣ים וָתֵ֑שַׁע שָׁנָ֔ה בְּהִמֹּל֖וֹ בְּשַׂ֥ר עׇרְלָתֽוֹ׃
י״ז : כה וְיִשְׁמָעֵ֥אל בְּנ֖וֹ בֶּן־שְׁלֹשׁ־עֶשְׂרֵ֣ה שָׁנָ֑ה בְּהִמֹּל֖וֹ אֵ֥ת בְּשַֽׂר־עׇרְלָתֽוֹ׃
י״ז : כו בְּעֶ֨צֶם הַיּ֥וֹם הַזֶּ֛ה נִמֹּ֥ל אַבְרָהָ֖ם וְיִשְׁמָעֵ֥אל בְּנֽוֹ׃
י״ז : כז וְכׇל־אַנְשֵׁ֣י בֵית֗וֹ יְלִ֤יד בָּ֙יִת֙ וּמִקְנַת־כֶּ֔סֶף מֵאֵ֖ת בֶּן־נֵכָ֑ר נִמֹּ֖לוּ אִתּֽוֹ׃
לֶךְ־לְךָ — עֲלִיָּה שְׁבִיעִית
פָּרָשַׁת לֶךְ־לְךָ · עֲלִיָּה שְׁבִיעִית · בְּרֵאשִׁית י״ז : כ״ג–כ״ז
י״ז : כג וַיִּקַּ֨ח אַבְרָהָ֜ם אֶת־יִשְׁמָעֵ֣אל בְּנ֗וֹ וְאֵ֣ת כׇּל־יִלִידֵ֤י בֵיתוֹ֙ וְאֵ֣ת כׇּל־מִקְנַ֣ת כַּסְפּ֔וֹ כׇּל־זָכָ֖ר בְּאַנְשֵׁ֣י בֵית אַבְרָהָ֑ם וַיָּ֕מָל אֶת־בְּשַׂ֖ר עׇרְלָתָֽם בְּעֶ֥צֶם הַיּֽוֹם־הַזֶּֽה׃
י״ז : כד וְאַבְרָהָ֖ם בֶּן־תִּשְׁעִ֣ים וָתֵ֑שַׁע שָׁנָ֔ה בְּהִמֹּל֖וֹ בְּשַׂ֥ר עׇרְלָתֽוֹ׃
י״ז : כה וְיִשְׁמָעֵ֥אל בְּנ֖וֹ בֶּן־שְׁלֹשׁ־עֶשְׂרֵ֣ה שָׁנָ֑ה בְּהִמֹּל֖וֹ אֵ֥ת בְּשַֽׂר־עׇרְלָתֽוֹ׃
י״ז : כו בְּעֶ֨צֶם הַיּ֥וֹם הַזֶּ֛ה נִמֹּ֥ל אַבְרָהָ֖ם וְיִשְׁמָעֵ֥אל בְּנֽוֹ׃
י״ז : כז וְכׇל־אַנְשֵׁ֣י בֵית֗וֹ יְלִ֤יד בָּ֙יִת֙ וּמִקְנַת־כֶּ֔סֶף מֵאֵ֖ת בֶּן־נֵכָ֑ר נִמֹּ֖לוּ אִתּֽוֹ׃
הַפְטָרַת לֶךְ־לְךָ · יְשַׁעְיָהוּ מ׳: כ״ז – מ״א: ט״ז
הַפְטָרַת לֶךְ־לְךָ · יְשַׁעְיָהוּ מ׳: כ״ז – מ״א: ט״ז
מ׳ : כז לָ֣מָּה תֹאמַ֤ר יַעֲקֹב֙ וּתְדַבֵּ֣ר יִשְׂרָאֵ֔ל נִסְתְּרָ֥ה דַרְכִּ֖י מֵיְהֹוָ֑ה וּמֵאֱלֹהַ֖י מִשְׁפָּטִ֥י יַעֲבֽוֹר׃
מ׳ : כח הֲלֹ֤א יָדַ֙עְתָּ֙ אִם־לֹ֣א שָׁמָ֔עְתָּ אֱלֹהֵ֤י עוֹלָם֙ יְהֹוָ֔ה בּוֹרֵ֥א קְצוֹת־הָאָ֖רֶץ לֹ֣א יִיעַ֑ף וְלֹ֥א יִיגָ֖ע אֵ֥ין חֵ֥קֶר לִתְבוּנָתֽוֹ׃
מ׳ : כט נֹתֵ֥ן לַיָּעֵ֖ף כֹּ֑חַ וּלְאֵ֥ין אוֹנִ֖ים עָצְמָ֥ה יַרְבֶּֽה׃
מ׳ : ל וְיִעֲפוּ֙ נְעָרִ֔ים וְיִגָּ֖עוּ וּבַחוּרִ֣ים כָּשֻׁ֑לוּ כָּשֽׁוֹל׃
מ׳ : לא וְקוֹיֵ֤ יְהֹוָה֙ יַחֲלִ֣יפוּ כֹ֔חַ יַעֲל֥וּ אֵ֖בֶר כַּנְּשָׁרִ֑ים יָרֻ֣צוּ וְלֹ֣א יִיגָ֔עוּ יֵלְכ֥וּ וְלֹ֖א יִיעָֽפוּ׃
מ״א : א הַחֲרִ֤ישׁוּ אֵלַי֙ אִיִּ֔ים וּלְאֻמִּ֖ים יַחֲלִ֣יפוּ כֹ֑חַ יִגְּשׁוּ֙ אָ֣ז יְדַבֵּ֔רוּ יַחְדָּ֖ו לַמִּשְׁפָּ֥ט נִקְרָֽבָה׃
מ״א : ב מִ֤י הֵעִ֙יר֙ מִמִּזְרָ֔ח צֶ֖דֶק יִקְרָאֵ֣הוּ לְרַגְל֑וֹ יִתֵּ֨ן לְפָנָ֤יו גּוֹיִם֙ וּמְלָכִ֣ים יַרְדְּ֔ יִתֵּ֤ן כֶּֽעָפָר֙ חַרְבּ֔וֹ כְּקַ֥שׁ נִדָּ֖ף קַשְׁתּֽוֹ׃
מ״א : ג יִרְדְּפֵ֥ם יַעֲבֹ֖ר שָׁל֑וֹם אֹ֥רַח בְּרַגְלָ֖יו לֹ֥א יָבֽוֹא׃
מ״א : ד מִ֤י פָעַל֙ וְעָשָׂ֔ה קֹרֵ֥א הַדֹּר֖וֹת מֵרֹ֑אשׁ אֲנִ֧י יְהֹוָ֛ה רִאשׁוֹן֙ וְאֶת־אַחֲרוֹנִ֖ים אֲנִי־הֽוּא׃
מ״א : ה רָא֤וּ אִיִּים֙ וְיִירָ֔אוּ קְצ֥וֹת הָאָ֖רֶץ יֶחֱרָ֑דוּ קָרְב֖וּ וַיֶּאֱתָֽיוּן׃
מ״א : ו אִ֣ישׁ אֶת־רֵעֵ֔הוּ יַעְזֹ֖רוּ וּלְאָחִ֥יו יֹאמַֽר חֲזָֽק׃
מ״א : ז וַיְחַזֵּ֤ק חָרָשׁ֙ אֶת־צֹרֵ֔ף מַֽחֲלִ֥יק פַּטִּ֖ישׁ אֶת־הָלֹ֣ם פָּ֑עַם אֹמֵ֤ר לַדֶּ֙בֶק֙ ט֣וֹב הוּא֙ וַיְחַזְּקֵ֔הוּ בְּמַסְמְרִ֖ים לֹ֥א יִמּֽוֹט׃
מ״א : ח וְאַתָּ֣ה יִשְׂרָאֵ֔ל עַבְדִּ֖י יַעֲקֹ֣ב אֲשֶׁר־בְּחַרְתִּ֑יךָ זֶ֖רַע אַבְרָהָ֥ם אֹהֲבִֽי׃
מ״א : ט אֲשֶׁר־הֶחֱזַקְתִּ֤יךָ֙ מִקְצ֣וֹת הָאָ֔רֶץ וּמֵאֲצִילֶ֖יהָ קְרָאתִ֑יךָ וָאֹמַ֤ר לְךָ֙ עַבְדִּ֣י אַ֔תָּה בְּחַרְתִּ֖יךָ וְלֹ֥א מְאַסְתִּֽיךָ׃
מ״א : י אַל־תִּירָ֡א כִּֽי־עִמְּךָ֣ אָ֔נִי אַל־תִּשְׁתָּ֖ע כִּ֣י אֲנִ֣י אֱלֹהֶ֑יךָ אִמַּצְתִּ֨יךָ֙ אַף־עֲזַרְתִּ֔יךָ אַף־תְּמַכְתִּ֖יךָ בִּימִ֥ין צִדְקִֽי׃
מ״א : יא הֵן־יֵבֹ֨שׁוּ וְיִכָּלְמ֜וּ כׇּל־הַנֶּחֱרִ֤ים בְּךָ֙ יִהְי֣וּ כְאַ֔יִן וְיֹאבְד֖וּ אַנְשֵׁ֥י רִיבֶֽךָ׃
מ״א : יב תְּבַקְשֵׁ֥ם וְלֹֽא־תִמְצָאֵ֖ם אַנְשֵׁ֣י מְצֽוֹתֶךָ֑ יִהְי֤וּ כְאַ֙פֶס֙ וּכְאָ֔יִן אַנְשֵׁ֖י מִלְחַמְתֶּֽךָ׃
מ״א : יג כִּֽי־אֲנִ֧י יְהֹוָ֛ה אֱלֹהֶ֖יךָ מַחֲזִ֣יק יְמִֽינֶךָ֑ הָאֹמֵ֣ר לְךָ֔ אַל־תִּירָ֖א אֲנִ֥י עֲזַרְתִּֽיךָ׃
מ״א : יד אַל־תִּירְאִ֤י תוֹלַ֙עַת֙ יַעֲקֹ֔ב מְתֵ֥י יִשְׂרָאֵ֖ל אֲנִ֣י עֲזַרְתִּ֑יךְ נְאֻ֥ם יְהֹוָ֖ה וְגֹאֲלֵ֥ךְ קְדוֹשׁ־יִשְׂרָאֵֽל׃
מ״א : טו הִנֵּ֨ה שַׂמְתִּ֤יךְ לְמוֹרַג֙ חָר֔וּץ חָדָ֖שׁ בַּ֣עַל פִּיפִיּ֑וֹת תָּד֤וּשׁ הָרִים֙ וְתָדֹ֣ק וּגְבָע֔וֹת כַּמֹּ֖ץ תָּשִֽׂים׃
מ״א : טז תִּזְרֵ֣ם וְרֽוּחַ־תִּשָּׂאֵ֔ם וּסְעָרָ֖ה תָּפִ֣יץ אֹתָ֑ם וְאַתָּ֙ה תָגִ֤יל בַּיהֹוָה֙ בִּקְד֣וֹשׁ יִשְׂרָאֵ֔ל תִּתְהַלָּֽל׃
Lech Lecha — End of Haftará
Shabbat Lech Lecha — Shalom Haverim · Complete Reading
Support
You can help spread the knowledge of the Torah throughout the world. Click the PayPal link below.